Mat á gæðum skólastarfs í Seyðisfjarðarskóla er hluti af reglubundnu starfi skólans og hefur það meginmarkmið að efla nám, kennslu, líðan og árangur nemenda. Matið er unnið í samræmi við lög um grunnskóla, aðalnámskrá grunnskóla, skólastefnu sveitarfélagsins og stefnu skólans.
Mat á skólastarfi er tvíþætt. Annars vegar er um að ræða innra mat, sem skólinn ber sjálfur ábyrgð á. Hins vegar er um að ræða ytra mat, sem unnið er af utanaðkomandi aðilum, svo sem sveitarfélagi, ráðuneyti eða öðrum þar til bærum aðilum. Niðurstöður innra og ytra mats eru nýttar til að greina styrkleika skólastarfsins, finna tækifæri til umbóta og fylgja eftir markmiðum skólans.
Innra mat skólans er kerfisbundið, markmiðsbundið og umbótamiðað. Það tekur til helstu þátta skólastarfsins, svo sem náms og kennslu, námsmats, líðan nemenda, samskipta, stjórnunar, starfsþróunar, skólamenningar, samstarfs heimilis og skóla og stuðnings við nemendur. Matið byggist á fjölbreyttum gögnum og upplýsingum, meðal annars könnunum, samtölum, fundargerðum, niðurstöðum námsmats, upplýsingum um skólasókn, niðurstöðum ytra mats og öðrum gögnum sem varpa ljósi á gæði skólastarfsins.
Við innra mat er lögð áhersla á virka þátttöku skólasamfélagsins. Starfsfólk, nemendur og foreldrar koma að matinu eftir því sem við á. Með því móti fæst fjölbreytt sýn á skólastarfið og betri grundvöllur skapast til að taka upplýstar ákvarðanir um þróun og umbætur.
Á hverju skólaári er unnin eða endurskoðuð matsáætlun þar sem fram kemur hvaða þættir skólastarfsins verða metnir, hvaða gagna verður aflað, hver ber ábyrgð á framkvæmdinni og hvernig niðurstöðum verður fylgt eftir. Niðurstöður matsins eru teknar saman, kynntar fyrir viðeigandi aðilum og nýttar við gerð umbótaáætlunar.
Umbótaáætlun byggist á niðurstöðum innra og ytra mats. Í henni eru skilgreind markmið, aðgerðir, ábyrgðaraðilar og tímarammi. Jafnframt er lagt mat á árangur umbóta með reglubundnum hætti. Þannig verður mat á skólastarfi lifandi ferli sem styður við faglega ígrundun, skólaþróun og aukin gæði náms og kennslu.
Skólinn birtir upplýsingar um innra mat, helstu niðurstöður og umbótaáætlanir með opinberum hætti, eftir því sem við á. Við birtingu upplýsinga er gætt að persónuvernd og trúnaði um málefni einstaklinga.
Markmið mats á gæðum skólastarfs í er að tryggja að skólastarfið sé í stöðugri þróun, að réttindi nemenda séu virt og að allir nemendur fái nám og þjónustu við hæfi. Matið á að stuðla að sameiginlegri ábyrgð skólasamfélagsins á góðum árangri, vellíðan og farsælu skólastarfi.
