Skólareglur

Skólareglur

Í Seyðisfjarðarskóla er velferð nemenda í fyrirrúmi og starfsfólk leggur sig fram um að tryggja nemendum öryggi, vellíðan, heilbrigði og vinnufrið til að þeir geti notið skólagöngu sinnar. Nemendur og starfsfólk hafa skilgreint hlutverk sín og sett sér sáttmála um góð samskipti. Skólareglur þessar byggja á hugmyndafræði uppeldisstefnunnar Uppbygging sjálfsaga/ uppeldi til ábyrgðar.

Í reglugerð Menntamálaráðuneytisins nr. 1040/2011 er kveðið á um að skólar skuli hafa skráðar reglur og viðurlög við brotum á þeim. Þar að auki er landslögum og lögum um skólahald fylgt í skólanum.

Æskileg hegðun:

Nemendur sinna sínum hlutverkum með því að:

mæta stundvíslega
koma fram við aðra af virðingu og kurteisi
bera ábyrgð á eigin námi, hegðun og samskiptum, með hliðsjón af aldri, þroska og aðstæðum
gæta að öryggi sínu
ganga vel um skólahúsnæðið og skólalóðina

Reglur gegn einelti:

Við leggjum ekki aðra í einelti. Við aðstoðum þá nemendur sem verða fyrir einelti. Við eigum líka að vera með þeim sem lenda í að vera einir. Ef við vitum að einhver nemandi er lagður í einelti eigum við að segja einhverjum fullorðnum frá því.

Skólinn er Olweusarskóli og fylgir ákveðnu verklagi við forvarnir og viðbrögð gegn einelti.

Viðbrögð við brotum á reglum gegn einelti - Sjá eineltisáætlun Seyðisfjarðarskóla.

Frávik frá skólareglum

Mikilvægt er að starfsmenn, foreldrar og nemendur séu meðvitaðir um æskilega hegðun og viðbrögð við hegðunarfrávikum. Farið er vel yfir muninn á æskilegri hegðun og hegðunarfrávikum með nemendum.

Viðbrögð við hegðunarfrávikum þurfa að vera skýr og fyrirsjáanleg.

Hegðunarfrávikum er skipt upp í þrjú stig eftir alvarleika.

Flestum málum lýkur með uppbyggingarsamtali.

Minniháttar hegðunarfrávik fyrnast en ef óviðunandi hegðun er viðvarandi er unnið náið í samstarfi við foreldra þar sem nemandanum er leiðbeint í átt að bættri hegðun.

1. stigs hegðunarfrávik

Dæmi um hegðunarfrávik þar sem ástæða er til að ætla að barn sé með ásetningi að brjóta skólareglur og tekur ekki leiðsögn starfsmanns.

Fylgir ekki fyrirmælum
Þrasar, ögrar, rífst
Truflar leiki eða vinnu annarra
Gengur illa um
Pikkar og potar, ögrandi snerting
Gargar, gólar, hleypur um
Kemur seint í kennslustund eða yfirgefur kennslustund án leyfis
Yfirgefur skólalóð án leyfis

Viðbrögð við 1. stigs hegðunarfráviki:

Athygli nemanda vakin á brotinu með uppbyggingarsamtali. Mikilvægt að nemanda sé gert grein fyrir því hvaða reglu hann braut og viti hvernig best er að bregðast við næst. Nemandinn hvattur til að finna leiðir til að leysa málið að sjálfsdáðum, eftir aldri og þroska. Starfsmaður tilkynnir umsjónarkennara um brotið ef þörf krefur. Nauðsynlegt er að fylgja nemandanum eftir í næstu kennslustund og upplýsa kennara þar um málið. Hlutaðeigandi kennari eða starfsmaður upplýsir forráðamenn í samráði við umsjónarkennara. Ef brotið beinist að samnemanda er mikilvægt að upplýsa forráðamenn þolanda um atvikið. Hlutaðeigandi kennari skráir í málaskrá nemanda ef um ásetning er að ræða eða nemandi tekur ekki leiðsögn. Aðrir starfsmenn senda umsjónarkennara tölvupóst með upplýsingum sem skráir í málaskrá nemanda.

Hlutaðeigandi starfsmaður upplýsir stjórnendur um málið.

Ef nemandi sýnir ítrekað fyrsta stigs hegðunarfrávik samsvarar það annars stigs hegðunarfráviki og skal framfylgt samkvæmt því.

2. stigs hegðunarfrávik

Dæmi um hegðunarfrávik þar sem illgirni og ásetningur ræður athöfnum og/eða orðum nemenda. Orð og atferli valda öðrum vanlíðan og /eða bera vott um vanvirðingu.

Notar særandi eða niðrandi orðbragð
Óhlýðnast, neitar ítrekað að fylgja fyrirmælum
Segir ósatt, svindlar
Hrekkir, stríðir
Skemmir eigur annarra eða skólans
Fer ekki eftir reglum um síma og tölvunotkun
Hnuplar
Áflog þar sem allir málsaðilar sættast og engir eftirmálar eru
Skrópar í tíma
Þegar nemandi fær annan nemanda til að framkvæma 2. stigs hegðunarfrávik

Viðbrögð við 2. stigs hegðunarfráviki:

Hlutaðeigandi kennari eða starfsmaður upplýsir forráðamenn, í samráði við umsjónarkennara. Ef brotið beinist að samnemanda er mikilvægt að upplýsa forráðamenn þolanda um atvikið. Hlutaðeigandi kennari skráir í málaskrá nemanda. Aðrir starfsmenn senda umsjónarkennara tölvupóst með upplýsingum sem skráir í málaskrá nemanda.

Hlutaðeigandi starfsmaður upplýsir stjórnendur um málið.

Ef nemandi sýnir 2 stigs hegðunarfrávik aftur boðar umsjónarkennari foreldra/forráðamenn til fundar með það að markmiði að útbúa uppbyggingaráætlun í samstarfi nemenda, foreldra og kennara.

Ef nemandi sýnir ítrekað annars stigs hegðunarfrávik samsvarar það þriðja stigs hegðunarfráviki og skal framfylgt samkvæmt því.

3. stigs hegðunarfrávik

Hér er um að ræða alvarleg hegðunarfrávik sem stofna öryggi og vellíðan nemenda og/eða starfsfólks í hættu og leiðir til alvarlegrar truflunar á skólastarfi.

Ofbeldi/líkamsárás
Verulega ógnandi hegðun/alvarlegar hótanir
Alvarleg skemmdarverk
Þjófnaður
Kynferðisleg hegðun
Meðferð vopna, eldfæra,ávana- og fíkniefna
Þegar nemandi fær annan nemanda til að framkvæma 3. stigs hegðunarfrávik

Viðbrögð við 3. stigs hegðunarfráviki:

Ef nemandi er uppvís að 3. stigs hegðunarfráviki er hann tekinn úr aðstæðum undir eftirliti starfsmanns/kennara.

Skólastjórnendur ræða við aðila málsins. Þeir afla upplýsinga frá þeim sem urðu vitni að atburðinum. Umsjónarkennari eða viðkomandi kennari/skólastjórnandi hringir í foreldra.

Í framhaldi meta skólastjórnendur alvarleika málsins.

Í alvarlegri tilvikum eru foreldrar/forráðamenn boðaðir til fundar með nemanda, skólastjórnanda og umsjónarkennara. Nemandi fer ekki inn í bekk fyrr en fundað hefur verið og málið til lykta leitt.

Sé ekki unnt að funda samdægurs er fundað strax við upphaf næsta skóladags, til að nemandi missi sem minnst úr kennslu.

Eftirfylgni

Ef hegðun er óbreytt og uppbyggingaráætlun ekki virt vísar stjórnandi málinu til Austurlandslíkans eða nemendaverndarráðs.
Í samvinnu við samstarfsaðila (foreldrar, barnaverndarnefnd, sérfræðiþjónusta, heilsugæsla, lögregla eða eftir því sem við á) er útbúin aðgerðaáætlun. Skólastjórnendur sjá til þess að henni sé fylgt. Jafnframt skal skóli halda skrá um atburði út frá sjónarhóli allra aðila og viðbrögð skóla og framvindu máls.
Við endurtekin brot er nemanda vísað frá skóla tímabundið eða ótímabundið eftir atvikum. Sbr. 14. gr. laga um grunnskóla, nr. 91/2008 og í reglugerð um ábyrgð og skyldur skólasamfélagsins í grunnskólum nr. 1040/2011.

Skráning

Mikilvægt er að halda utan um öll atvik sem upp koma og hvort haft sé samband við foreldra. Sá starfsmaður sem verður vitni að brotinu skráir málið. Kennarar skrá málið beint í málaskrá nemenda og koma afriti til umsjónarkennara og stjórnenda. Aðrir starfsmenn skrá brotið og koma skráningu til umsjónarkennara sem skráir það í málaskrá nemandans. Ef brotið beinist að samnemanda er mikilvægt að skrá málið í málaskrá viðkomandi nemanda.

Eftirfarandi skal skráð:

Dagsetning.
Hvaða starfsmaður tilkynnir.
Hvað gerðist – fjalla ítarlega um hvað er að ræða, formála og atvik.
Hver voru viðbrögðin – taka saman hver viðbrögðin voru og hvort að atvikið sé álitið afgreitt eða opið.
Hvað gerist í kjölfarið.
Niðurstaða.

Leikskóladeild

Fyrstu viðbrögð

Fyrstu viðbrögð starfsmanns eru uppbyggingarsamtal. Undantekningarlaust tilkynnir starfsmaður deildarstjóra um brotið á þar til gerðu eyðublaði og deildarstjóri upplýsir forráðamenn. Ef brotið beinist að samnemanda er mikilvægt að upplýsa einnig forráðamenn þolanda um atvikið.

Stjórnendur upplýstir um atvikið.

Næstu skref

Ef nemandi lætur ekki af óæskilegri hegðun metur kennari næstu skref sem geta verið eftirfarandi:

Aðstoðarskólastjóri á uppbyggjandi samtal við barn að ósk deildarstjóra. Deildarstjóri upplýsir forráðamenn um samtalið.
Stjórnandi boðar foreldra á fund þar sem unnið er að uppbyggingaráætlun. Deildarstjóri og stjórnandi sitja þennan fund auk starfsmanna sem koma að málinu.

Eftirfylgni

Ef hegðun er óbreytt og uppbyggingaráætlun ekki virt vísar stjórnandi málinu til Austurlandslíkans eða nemendaverndarráðs.

Skráning

Mikilvægt er að halda utan um öll atvik sem upp koma og hvort haft sé samband við foreldra. Sá starfsmaður sem verður vitni að brotinu skráir málið og kemur skráningu til deildarstjóra sem heldur utan um málefni nemenda sinna. Ef brotið beinist að samnemanda er mikilvægt að skrá málið í málaskrá viðkomandi nemanda.

Aðrar reglur í Seyðisfjarðarskóla

-til að tryggja öryggi nemenda, heilbrigði og vinnufrið-

Reglur um skólaforðun

Mikil fjarvera frá skóla hefur samkvæmt rannsóknum neikvæð áhrif á upplifun nemenda af skólagöngunni, slæm áhrif á líðan þeirra og námsárangur og félagslega stöðu. Á vef skólans eru leiðbeiningar varðandi leyfi nemenda. Við beinum tilmælum til foreldra að ígrunda vel umsóknir um leyfi á skólatíma. Sjá nánar í bækling um skólaforðun á vef skólans.

Viðbrögð við skólaforðun

Ef fjarvera fer í 5% (níu daga fjarvera, tíu seint eða fimm skróp) hringir umsjónarkennari í foreldra og ræðir ástæður fjarveru. Náms- og félagsleg staða nemanda metin í sameiningu og farið yfir mögulegar úrbætur. Umsjónarkennari skráir samtalið í málaskrá nemanda.
Ef fjarvera fer í 10% (átján daga fjarvera, tuttugu seint eða tíu skróp). Umsjónarkennari boðar foreldra og eftir atvikum nemanda á fund. Náms- og félagsleg staða nemanda metin, áhrif rædd og farið er yfir mögulegar úrbætur. Gerður er skriflegur samningur um úrbætur sem gildir til skamms tíma, 3-4 vikna hið mesta. Annar viðeigandi stuðningur veittur af skóla ef þörf er á. Umsjónarkennari skráir í málaskrá nemanda.
Ef fjarvera ykst þrátt fyrir samning um annað boðar umsjónarkennari foreldra og eftir atvikum nemanda á fund Austurlandslíkansins. Þar sitja sérfræðingar frá skóla, félagsþjónustu og heilsugæslu sem geta boðið meiri stuðning og aðstoð en skólinn einn og sér. Umsjónarkennari skráir í málaskrá nemanda.

Notkun á reiðhjólum og öðrum fararskjótum

Nemendur og starfsfólk er hvatt til að koma hjólandi eða gangandi í skólann sér til heilsubótar og til að minnka umferð ökutækja við skólann. Það er hins vegar alltaf á ábyrgð foreldra að nemendur noti viðeigandi öryggisbúnað. Samkvæmt 44. gr. umferðarlaga má barn yngra en 9 ára ekki hjóla á akbraut nema undir leiðsögn og eftirlits einstaklings sem náð hefur 15 ára aldri. Hjólin eru á ábyrgð nemenda og forelda. Nemendum er ekki heimilt að nota hjólið á skólatíma nema með öryggishjálm og á fyrirfram skilgreindum hjólasvæðum.

Notkun á snjalltækjum og öðrum raftækjum

Snjalltæki geta verið handhæg til ýmissa hluta nytsamleg. Þau geta eflt öryggi, stytt boðleiðir og með þeim er hægt að afla sér upplýsinga á skilvirkan hátt. Nemendur skólans hafa til umráða ipada í kennslustundum auk þess sem nemendur á unglingastigi mega hafa síma með sér í skólann. Nemendur og starfsfólk þurfa að gæta öryggis í notkun þessara tækja, tryggja vinnufrið nemenda og starfsfólks og sýna hvert öðru tillitssemi.

Öll snjalltæki sem nemandi hefur meðferðis í skólann er á ábyrgð eiganda. Snjalltæki mega ekki hafa truflandi áhrif á nám, kennslu, félagsstarf eða frímtíma nemenda á skólatíma og á vegum skólans. Nemendi þarf að hafa leyfi kennara til að nýta tækið í kennslustund. Myndatökur og hljóðupptökur eru ekki heimilar á skólatíma, nema með sérstöku leyfi.

Viðbrögð

Sé nemandi staðinn að notkun snjalltækja í skólanum án leyfis kennara mun tækið gert upptækt og geta foreldrar/forráðamenn nálgast það á skrifstofu skólans.

Nesti að heiman

Seyðisfjarðarskóli er heilsueflandi skóli og er því mælst til þess að fylgt sé tilmælum frá manneldisráði og tannverndarráði við val á nesti sem nemendur koma með að heiman. Nemendur mega ekki neyta sælgætis né kolsýrðra drykkja í skólanum nema við sérstök tilefni, með leyfi kennara.